Order Cialis

Allt er með kyrrum kjörum Freydís er á góðri leið með að verða góð af kvefinu og reyndar pabbinn og mamman líka. Freydís er orðin rúm 4 kg sem er nú bara nokkuð gott !! búin að vaxa um ca 800 grömm á 4 vikum sem mér telst til að séu 200 grömm á viku. Ef ég þyngdist um 200 grömm á viku væri búið að setja mig í megrun Amma Lilja og Afi Bragi voru í heimsókn um helgina og heilluðust alveg af barnabarninu og vildu helst ekkert fara. Vorið er komið í Svíþjóð undanfarið hefur hitinn verið í kringum 10 - 15 gráður á daginn og stundum koma sólardagar …. þannig að ég fór í Rúmfatalagerinn og keypti borð og stóla og ódýrasta grillið þannig að við erum tilbúinn í gírinn.

Jæja þá er amma Anna Karen farin heim aftur og hennar er nú sárt saknað því það var frábært að hafa hana hérna. Því miður var Freydís komin með hita daginn sem hún flaug heim og við urðum að fara með hana upp á spítala. Þar vildu þeir endilega að við gistum eina nótt því hún er svo lítil ennþá að þeim fannst ástæða til að fylgjast grannt með henni. En sem betur fer var hún orðin hitalaus aftur um nóttina svo að við fórum bara aftur heim daginn eftir. En greyið mamma varð að vera ein heima hjá okkur allan síðasta daginn sinn og var held ég alveg í öngum sínum. En, sem sagt, allt fór á besta veg og dúllan er bara með kvef núna sem við erum að vonast til að fari að hverfa. Erfitt fyrir þessi litlu grey að vera kvefuð þar sem þau kunna bara að anda með nefinu, svo þegar það stíflast að þá ná þau ekki andanum. Þá er það Nezeril sem gildir Já, mamma tók nú allavega nóg af myndum, hátt í 200 hundruð held ég, á 6 dögum, það er ekki illa af sér vikið, þannig að hún getur deyft mestu fráhvarfseinkennin með því að skoða þær, hihi. Afi Jón Steinar komst ekki út í þetta skiptið en þau ætla að koma bæði í byrjun Maí í smá kíkk aftur.

Svo eru Amma Lilja og Afi Bragi að koma í dag og verða hjá okkur í 4 daga. Þau fá fínt veður, svona snemmvorveður, sól og bjart en ögn kallt. Vonandi hafa þau bara gaman af að hitta barnabarnið og kíkja aðeins á Lund í góða veðrinu. Ef Freydís verður skárri þá getum við kannski kíkt eitthvað saman niður í bæ

Mér finnst svo fyndið að kalla mömmu og pabba og Lilju og Braga, ömmu og afa, alveg eins og mér finnst ennþá örlítið skrítið að tala um sjálfa mig sem mömmu og Reyni sem pabba en þetta venst nú furðu fljótt. Smá spurning hvort pabbi eigi að vera kallaður afi Jón þar sem afi minn svara því kalli. Kannski er afi Jón Steinar betri eða þá verður afi Jón að vera langiJón, hihihi…..það kemur í ljós!!

Já hér er sko gluggaveður, ljómandi fallegt vorveður en skítakuldi. Erum samt að spá að fara bráðlega í smá göngu með þá litlu þar sem við erum búin að sannfærast um að hún sé ekki lengur neitt kvefuð að ráði. Enda á hún svo svakalega mikið að fínum hlýjum fötum og sokkum og húfum sem hún hefur fengið frá hinum ýmsu ættingjum og vinum og þökkum við Freydís Edda alveg kærlega fyrir allar fallegar gjafir sem hafa borist

Amma Anna kom sem sagt á þriðjudaginn í heimsókn, hlaðin pökkum handa Freydísi og Cheerios handa okkur og það er búið að vera frábært að hafa hana í heimsókn. Við búin að ná upp smá svefni og satt best að segja varla búin að sjá dótturina síðan amman kom. Reynir er hræddur um að hann verði kominn úr allri bleyjuskiptiæfingu áður en yfir lýkur Annars eru þær mestu mátar og amman hefur svo gaman að snúllast með þá litlu. Ekki spillir heldur fyrir að hafa eitt par af auka höndum til að elda og annað svona praktískt.

Mamma er sem sagt komin niður í bæ þessa stundina að taka út búðirnar eins og henni einni er lagið og svo ætlum við kannski að kíkja aðeins saman í Nova Lund mollið á morgun. Vorum jafnvel að spá í að taka mömmu á orðinu og láta hana passa aðeins fyrir okkur á föstudagskvöldið og skella okkur eitthvað út að borða saman, smá svona rómó Jæja, fleiri fréttir síðar, bæjó.

Fyrir þá sem hafa áhuga þá eru komnar aðeins fleiri myndir. Það er mikil pressa að heiman um að inn komi nýjar myndir með stuttu millibili, en hafa verður í huga að við tökum nú ekki myndir á hverjum degi……bara svona annan hvern dag, hihi

Við segjum annars bara allt að fína. Eftir mikla vökunótt í fyrrinótt ákvað mín að sofa eins og engill í nótt og því eru foreldrarnir bara nokkuð hressir í dag. Meira að segja svo hressir að ákveðið var að skella sér út og kaupa nýtt sjónvarp. Sjónvarpið sem við erum með er gamla fermingarsjónvarpið hennar systur minnar sem er aðeins farið að vera leiðinlegt því það þarf að hitna aðeins áður en stöðvarnar komast í fókus. En svo langaði mig líka svo að hafa sjónvarp inni í svefnherbergi, sérstaklega núna þegar maður fer snemma að sofa og rúmmið er mikil miðstöð atburða. Það vildi líka svo heppilega til að amma og afi gáfu mér smá aur og þetta sjónvarp er því frá þeim. Þetta er nú samt ekkert risasjónvarp en það vill svo heppilega til að það er næstum helmingi ódýrara hérna heldur en heima þannig að þetta eru náttla hin bestu kaup

Erum svo búin að skipuleggja fyrsta göngutúr Freydísar á mánudaginn, ef veður leyfir. Þá veður hún akkurat tveggja vikna gömul og Íslendingarnir eru með smá boð þannig að það passar fínt að klæða sig upp og spássera sem leið liggur til Bryndísar og Sigurjóns í páskaboð. Sjáum svo til hvort stoppum eitthvað, því allur krakkaskarinn er búinn að vera með einhverjar flensur sem okkur langar ekkert að ná okkur í. Jæja, bæ í bili!

Búið er að nefna dótturina. Hún heitir Freydís Edda Reynisdóttir

Jæja, þá er maður bara orðin mamma!!!!!!! Vá, ekkert smá sjokk í rauninni, þrátt fyrir að maður hafi haft 9 mánuði til að venjast tilhugsuninni. Varð einhvern veginn hálf hissa þegar út spýttist bara lítið kríli, og stelpa þar að auki. Vorum sko alveg handviss um að þetta væri strákur, hihi. En þetta gekk ótrúlega vel allt saman……ég vaknaði með verki kl.5 að morgni 14.mars og eftir klukkutíma voru verkirnir farnir að koma á 3 mínútna fresti. Þegar ég hringdi upp á spítala var mér sagt að taka því bara rólega því þetta væri nú fyrsta barnið mitt og fæðingin tæki örugglega langan tíma. Ljósmóðirin sagði mér að prufa bara að fara í sturtu til að lina verkina og ég hlýddi náttla bara eins og góðri stúlku sæmir. Eftir að hafa staðið í sturtunni í smá tíma var ég samt búin að gefast upp og sagði Reyni að nú vildi ég sko bara fara upp eftir. Vildi svo til að ég missti vatnið um leið og ég steig út úr sturtunni og því varð smá paník að drífa sig upp á deild. Vinur okkar skutlaði okkur upp eftir, vildi ekki betur til en að við gleymdum journalinum mínum og ljósan ætlaði ekki að vilja gera neitt fyrir mig fyrr en búið var að ná í hann. Hún skipti hins vegar snögglega um skoðun þegar í ljós kom að ég var komin með 10 í útvíkkun og byrjuð að rembast. Tæpum þremur tímum, miklu peppi frá Reyni og smá aðstoð frá ljósmæðrunum síðar kom svo dúllan í heimin klukkan 10:57.

Eftir á að hyggja gekk þetta allt ótrúlega vel og ég er svo fegin að hún kom viku fyrir tímann í staðinn fyrir 1-3 vikur eftir tímann. Eftir fæðinguna voru okkur boðnar samlokur og gos á bakka með sænskum fána, mjög krúttlegt. Við vorum svo fjóra daga upp á Patienthotellet, svona semihótel/sjúkrahús þar sem voru ljósur á vakt en er að öðru leyti eins og venjulegt hótel. Það var rosalega gott að nýta sér það því stúlkan var voðalega þreytt fyrstu sólahringana og löt við að drekka. En nú erum við komin heim og erum smátt og smátt að móta okkar eigin rútínu. Sú litla sefur ágætlega á milli gjafa en var samt fljót að sjá þægindin í því að liggja lengi á brjósti og kúra svolítið þar

Svo fara að koma páskar, við búin að skreyta pínulítið og fá lánaðan gulan galla fyrir skvísuna Gleðilega páska

Jæja, þá er ég sestur við tölvuna aftur. Elva og litla prinsessan eru ennþá á Patienthotellet við spítalann. Þeim heilsast báðum afar vel. Sú litla er reyndar soldið löt við að drekka og á það til að sofna í miðjum matmálstíma þannig að mamma og pabbi þurfa oft að vekja hana til að halda henni við efnið. Hún kom í heiminn klukkan 10:57 á mánudag eða einni viku fyrir tímann og vó 3180 grömm og var 49 cm. Ég setti inn nokkrar myndir á prinsessan

//Reynir, Elva og Prinsessan

Sæl öll sömul þarna úti, það er kominn lítil stelpa í heiminn frá og með gærdeginum. Bæði mömmunni og þeirri litlu heilsast vel.

//Reynir, Elva og Reynisdóttir

Jæja, bara til að sanna að bumban er sko orðin rosastór þá set ég hérna inn eina mynd í viðbót

Fyrir níu mánuðum síðan fóru nokkrar frumur að fjölga sér á ógnarhraða og eftir kúnstarinnar reglum og fyrr en varði var orðin til lítil eftirmynd ungabarns í á stærð við títuprjón. Þetta litla ósjálfbjarga líf hélt síðan áfram að margfalda stærð sína á nokkurra daga fresti, enda beintengt við orkugjafa sem sá því fyrir ofgnótt af fæðu og súrefni. Eftir að hafa þroskast og vaxið í koldimmu, blautu og heitu umhverfi ákveður líkami orkugjafans allt í einu að barnið sé tilbúið að fara að heiman og ýtir því með herkjum og krömpum út í stórfurðulegan heim þar sem plássið er ótakmarkað, birtan ógnarmikil, kuldinn ókunnugur og loft leikur um húð og lungu. Allt í einu þarf barnið að hafa fyrir því að ná sér í bæði súrefni og mat. Er nokkuð skrítið að börn gráti þegar þau koma í heiminn!

Spáið í ef maður myndi eftir þessum degi sjálfur…..örugglega þvílíkt sjokk….kannski bara best að maður man ekki neitt Kannksi er þetta bara svolítið spennandi, hundleiðinlegt að hangsa í þessum maga að eilífu, hihihi. Ætli barnið sé ekki líka bara fegið að fæðingunni sé lokið því hún er nú líklega ekkert þægileg fyrir það heldur!

Eníveis….nóg um það. Reynir þreif undan baðkerinu um daginn…..það er þannig að það lekur bara beint úr sturtunni og baðinu niður um niðurfall undir baðinu og þetta niðurfall var sem sagt stíflað. Þegar við tókum hliðina af baðkerinu frá þá mátti glögglega sjá að þarna undir hafði ekki verið þrifið í ótal mörg ár því þar var að finna skemmtilega flóru af skít. Grindin af niðurfallinu var ekki yfir niðurfallinu sjálfu og fyrir vikið hafði safnast allskonar drals frá fyrri leigjendum ofan í sarpinn, eins og rakvélarblað og sjampótappi. Þetta var bókstaflega ógeðslegt og Reynir greyið sem varð að skríða þarna undir baði til að tæma niðurfallið og skrapa skítinn af flísunum var eiginlega með hálfgerðan hroll það sem eftir var dags En nú er allavega hægt að fara í bað án þess að það flæðu út um allt gólf og þar að auki er miklu betra loft inni á baði eftir að búið er að fjarlægja vibban af gólfinu